Tymor y Gwanwyn 2010

Yn ystod y tymor, rydym wedi bod yn astudio yr India. Rydym eisoes wedi darganfod nifer o ffeithiau diddorol am y wlad ac wedi gwylio fideos a lluniau arbennig o fywydau'r bobl sy'n byw yno. Rydym wedi llwyddo i sylwi ar lawer o debygrwydd a gwahaniaethau rhwng yr India a Chymru. Rydym wrthi'n dysgu am y ddinas, Bangalore. Mae'n ddinas sy'n llawn o amrywiaeth. Mae yno dlodi a thraddodiadau hen ffasiwn, yn ogystal a swyddfeydd uchel o wydr a chyfoeth amlwg. Byddwn yn symud ymlaen i ddysgu am bentref bach Chembakoli cyn hir. Cadwch lygaid allan wrth i luniau o'n gwaith gael eu hychwanegu isod.

Cofiwch glicio ar y botwm 'Gwefan yr Urdd - Teimladau' er mwyn gweld casgliad o waith celf rhai o ddisgyblion blwyddyn 6 ar y thema 'Haiti'. Maent werth eu gweld!

Tymor yr Hydref 2009

Rydym wedi bod yn astudio cyfnod y Rhufeiniaid yn ein gwersi Hanes y tymor hwn. Rydym wedi dysgu am sawl agwedd o fywydau'r bobl hyn, gan gynnwys eu cartrefi, doniau, addysg a thraddodiadau. Bum ar daith i Gaerleon yn gynt yn y tymor er mwyn gweld y Gaer Rufeinig sydd yno. Gwelsom adfeilion y barics, yr amffitheatr a'r baddonau, cyn mynd i mewn i'r amgueddfa i weld yr arteffactau amrywiol. Cawsom gyfle i wisgo arfwisgoedd milwrol a dynwared bod yn was neu fonheddwr Rhufeinig. Roedd yn llawer o hwyl a gwnaeth pawb fwynhau.

Rydym wedi bod yn astudio Ynys Sgomer a Sir Benfro yn y gwersi Daearyddiaeth. Dysgom am nodweddion daearyddol yr ardal a gwnaethom ychydig o waith mapio. Gwnaethom waith creadigol am yr ynys hefyd, gan greu haicws ac ysgrifennu cyfweliad rhwng dau berson oedd yn trafod y swydd o fod yn warden ar yr ynys.